Welcome

Regierungsmitteilung zur Pensionskasse (romanisch)

Il nivel da las rentas tar la cassa da pensiun dal Grischun duai vegnir segirà

La regenza grischuna suttametta al cussegl grond ina revisiun parziala da la lescha davart la cassa da pensiun dal Grischun. Proponidas vegnan mesiras da sustegn, per ch’il nivel da las rentas possia vegnir mantegnì er en l’avegnir.

Pervia dal svilup demografic e perquai ch’ils retgavs da las investiziuns da chapital cun paucas ristgas èn a medem temp regressivas, han las cassas da pensiun en Svizra stuì sbassar las rentas ils onns passads. Da questa tendenza n’è er la cassa da pensiun dal Grischun (CPGR) betg mitschada. Tras las reducziuns necessarias da las tariffas da tschains e da conversiun tar la CPGR èn resultadas dapi l’onn 2006 rentas da vegliadetgna (rentas novas) ch’èn – per la fin da l’onn 2012 – circa 10 pertschient pli bassas.

L’ultima adattaziun da la tariffa da tschains tecnica e da las tariffas da conversiun, ch’è stada necessaria en chaussas tecnicas d’assicuranza per il 1. da schaner 2013, duai ussa dentant vegnir mitigiada cun mesiras da sustegn. Grazia a questas mesiras duai esser avant maun dapli chapital da spargn per la vegliadetgna il mument dal pensiunament. Uschia po vegnir cuntanschida ina renta ch’è quasi uschè auta sco dal temp che las tariffas da conversiun eran pli autas.

Grevezzas supplementaras giustifitgablas

 

Concretamain duai la durada da spargn tar la CPGR vegnir prolungada in pau, e las contribuziuns da spargn duain vegnir auzadas levamain. Igl è previs da cumenzar a spargnar gia en la vegliadetgna da 20 onns (fin ussa 25 onns) e d’augmentar levamain las contribuziuns en la segunda mesadad da la carriera a partir da la vegliadetgna da 45 onns. La contribuziun da la singula collavuratura u dal singul collavuratur è en media circa 207 francs per onn pli auta. Las patrunas ed ils patruns vegnan engrevgiads en media cun custs supplementars da circa 254 francs per lavuranta u lavurant ed onn. Il chantun sco patrun sto pia far quint cun custs supplementars da var 750 000 francs per onn per sias circa 3000 collavuraturas e collavuraturs.

Tras la via proponida po vegnir impedida ina reducziun da las prestaziuns tar las rentas da vegliadetgna. Quai correspunda als interess da las persunas assicuradas e po vegnir cuntanschì cun grevezzas supplementaras giustifitgablas per ils partenaris socials. Las rentas da vegliadetgna currentas na vegnan betg tangadas. Ellas restan sin il nivel actual.

Il cussegl grond vegn a tractar en la sessiun da zercladur 2014 la missiva tar la revisiun parziala da la lescha davart la cassa da pensiun dal Grischun.

Infurmaziuns:

 

cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: barbara.janom@dfg.gr.ch

Gremi: regenza

Funtauna: rg chanzlia chantunala dal Grischun

Weiter lesen ...
Publiziert in Altersvorsorge, Vernehmlassungen.

VBS © All rights reserved.